"Pana-panahon ang pagkakataon
Maibabalik ba ang kahapon"
Lyriko ng isang sikat na awitin
Pero atin ito ngayong pagnilay nilayin
Gaya ng bulaklak na yumayabong
Mga puno na umuusbong
Mga hayop na lumalaki
Mga ibong lumilipad sa tabi-tabi
May panahong sila ay namumukadkad
May panahon ding natutuyot at nawawalan ng pakpak para makalipad.
Ang bulaklak na may bango
Dumarating ang panahong natutuyo
Samyo nito ay wala ng halaga sa mundo
Pero tandaan minsan sila ay pinuri mo
Pinagmasdan ang ganda nito
At baka nga pinitas mo pa sa kagalakan na naidulot sa buhay mo.
Magsilbi sanang aral sa ating pagkatao
Mga nilikha ng Maykapal, lahat may panahon sa mundo
Ginawa nila ang kanilang tungkulin, nakapagbigay kasiyahan sa maikling tagubilin
Sana ay gawin din natin, magsilbing kasayahan sa buhay ng iba habang panahon pa natin.
Iba-iba ang panahon
Pero minsan lang ito daraan sa buong maghapon
Gawin itong makabuluhan
Para sa sangkatauhan
Gaya ng bulaklak sa inyong harapan
Mananatili ang bango at ganda na naidulot sa inyong katauhan.
Panulat: Annaliza V. Aquino
🗒🖊anna09
10-20-2020
painter: gorgeous Maureen Villanueva