Nasubukan mo ba
Nung ikaw ay muntinyg prinsesa
Naglaro sa iyong kaharian
Mukha ay madungis man
Sayo nama'y nakapalamuting
Ginawang kwintas, pulseras at singsing
Santan na pinagdugtong-dugtong
Galing sa kumpol niyang mayabong
Minsan nama'y bili-bilihan,
O kaya'y tinda-tindahan
Paninda mo'y mga bato
Bua at kung anu-ano
Pera-perahan, dahon ng santan
Iba't ibang halaga kahit iisang kulay, luntian
Lutu-lutuan, kunwari'y restawran
Ihahain, iba't ibang kulay naman
Yaon pa rin, bulaklak ng santan
Tutuhugin, mga dahon naman
Para kunwari, ihaw-ihawan
Nang ang prinsesa'y naging dalaga
Sa kanya'y may prinsipeng humanga
Regalo sa magandang dilag na sinisinta
Sapagkat payak ang buhay, santan lang ang kinaya
Gayunpaman ang mayuming dalaga
Lubos niyang napapasaya
Bulaklak ng santan ngayo'y palamuti na sa tenga
Na lubos sa kanya, mula pagkabata ay nagpapaganda