D E T E R M I N A S Y O N


By Ledarose Delima on 27th Jul 2022

Migrant Writers of Hong Kong
 Image

NAPADAKO ANG MGA mata ko sa lumang litrato.

Nagbalik ang nakaraan sa alaala ko.

Mga panahon noong nasa eskwela pa ako.

Nagising ang isang pangarap na matagal din nahimlay sa puso ko.

 

Sekondarya ako noon nang mapukaw ang interes ko.

Sa paggawa ng tula at maiikling kwento.

Naalala ko pa naging scriptwriter ako at direktor ng El Filibusterismo.

Akala ko nalimutan ko na ang pangarap kong ito.

Dahil salat sa kaalaman pati na sa mga sertipiko.

 

Dahil sa kahirapan ng buhay noon.

Hindi na ako nabigyan ng pagkakataon.

Mapabilang man lang sa mga kaklase ko na nasa kolehiyo noong mga panahong iyon.

Halos karamihan sa kanila ngayon, magaganda ang mga propesyon.

Kaya minsan naiisip ko, ano kaya ang buhay ko ngayon kung nabigyan ako ng pagkakataon?

Ano kaya ang magiging ako sa ngayon?

Pero syempre habang tumatanda ka

at mayroon ka ng sariling pamilya.

Pananaw mo sa buhay ay nag-iiba.

Nagkakaroon ka ng realisasyon sa maraming bagay kapagdaka.

Binibigyan mo na ng katwiran ang bawat sitwasyon.

At mga pangyayari na hindi umaayon sa panahon.

 

Hindi pala basehan ang taas ng pinag-aralan.

Hindi pala basehan ang taas ng grado mo sa eskwelahan.

Hindi pala kakulangan kung salat sa kaalaman.

Hindi pala basehan kung ikaw ay may pinag aralan.

Hindi pala basehan ang diploma na iyong pinanghahawakan.

Hindi din pala basehan kung anuman ang iyong katayuan.

 

Kapag pala may pangarap ka.

Kahit sa palagay mo ay huli na.

Kahit na lumipas pa ang ilang dekada.

Subukan mong abutin at sikapin.

Malay mo pinahihinog ka lang pala ng Panginoon.

Upang handa ka na kapag dumating ang iyong pagkakataon.

Katulad ko...

Ang munti kong pangarap noon.

Sisikapin ko na unti-unti kong makamit sa ngayon.

Nalipasan man ako ng mahabang panahon.

Ayokong sayangin ang ibinigay sa akin na pagkakataon.

Kaakibat ng aking determinasyon.

Sampu ng aking mga inspirasyon.

At sa patnubay ng ating Panginoon.

Makipot man ang daan paroon.

Patungo sa pangarap na inaasam ko noon.

Hindi man maabot ang sukdulan.

Sisikapin ko, marating man lang ang kalahatian.

Mula sa panulat ni: black angel

Maraming salamat po.